आज : २०७४ माघ १० बुधबार | Today: 24th Wednesday, 2018

गजलः जैलेदेखि धरतीमा....

जैलेदेखि धरतीमा खुट्टा टेक्न थाल्यो उसले
तैलेदेखि जिन्दगीको पापड बेल्न थाल्यो उसले ।

 

भाग्य कोर्ने भावि स्वयं सन्तापमा भेटेपछि 
उपरान्त आफ्नो भाग्य आफैं केर्न थाल्यो उसले ।

 

सम्बन्धका पुतलीले डसे उसलाई बिच्छी बनी 
आफ्नै चित्त शान्त गर्न गजल लेख्न थाल्यो उसले ।

 

काफिया र रदिफ जति छोक्रा मात्र बाँकी थिए
तखल्लुसलाई छपनीमा राखी चेप्न थाल्यो उसले ।

 

दिँदा सबै खुशी हुन्छन्, बलि दिन्छु “दुर्गा” लाई 
भन्दै इच्छा आकांक्षाको घाँटी रेट्न थाल्यो उसले ।

                                                                                         

                                                                                            –दुर्गा प्रसाद ग्वालटारे
                                                                                              कौशलटार, भक्तपुर